ՆԱՎԱՍԱՐԴ (հին հնդկական նավասարատա, իրանական նավասարհատու - Նոր տարի, նոր շար), հին հայկական տոմարի առաջին ամիսը: Հաջորդել է տարվա վերջի Ավելյաց կոչվող տոնական հինգ օրերին: Ավետել է Նոր տարվա սկիզբը: Նավասարդի առաջին՝ Արեգ օրը (համապատասխանում է օգոստոսի 11-ին) համարվել է հայոց քաղ. և սրբազան տարեգլուխը (տես Ամանոր). Նավասարդի առաջին օրերին կատարվել են ամենաբազմամարդ («համաշխարհական») տոնահանդեսները: Ուխտավորները՝ ժողովուրդը, զորքը, արքունիքը, իշխանական տները, հոգևորականությունը, հանդիսավոր երթերով խմբվել են Տարոն և Բագրեվանդ գավառների սահմանագլխին, սրբազան Արածանի գետի և Նպատ լ. շուրջ, վերջինիս ստորոտին գտնվող Բագավանի տաճարում, որտեղ տոնահանդեսներն ուղեկցվել են զոհաբերումներով, փոխադարձ նվիրատվություններով, խրախճանքներով, երաժշտությամբ, երգերով, պարերով, թատերախաղերով, ռազմախաղերով, որսորդական զվարճություններով ևն:
Աղբյուրը՝ «Հայկական համառոտ հանրագիտարան», հատոր երրորդ, գլխ. խմբ. Հ. Այվազյան, Հայկական հանրագիտարան հրատ., Երևան, 1999, էջ 855:
Տես նաև՝
Պողոսյան Ե., Նոր տարվո տոնը հին և նոր հայոց քով, Վնն., 1952:
Ալեք Մանուկյան 1,
ԵՊՀ 2-րդ մասնաշենք,
5-րդ հարկ,
Հեռ.` + 37460 71-00-92
Էլ-փոստ` info@armin.am
Բոլոր իրավունքները պաշտպանված են: Կայքի նյութերի մասնակի կամ ամբողջական օգտագործման, մեջբերումների կատարման դեպքում հղումը պարտադիր է` www.armeniaculture.am