• Նորություններ
• Հղումներ
• Գործընկերներ
• Կայքի Քարտեզ

 ՖԵԹՎԱՃՅԱՆ Արշակ Աբրահամի [1.10.1866, Տրապիզոն - 7.10.1947, ք. Մեդֆորդ (Նյու Յորքի նահանգ), 1948-ին աճյունը տեղափոխվել է Երևան], նկարիչ: Ավարտել է Կ. Պոլսի գեղարվեստի վարժարանը (1887), սովորել է Հռոմի գեղարվեստի ակադեմիայում (1887-91): 1891-ին մասնակցել է Իտալիայի նկարիչների ազգային ցուցահանդեսին: 1891-95-ին ստեղծագործել է Վիեննայում, ապա՝ Ս. Պետերբուրգում, դարձել Ռուսաստանի նկարիչների ընկերության անդամ: Շրջել է Արևելյան Հայաստանում, նկարել հայկական ճարտարապետական հուշարձաններ, ստեղծել ավելի քան 2000 մատիտանկար ու ջրաներկ գործեր: Հեղինակ է նաև դիմանկարների, հայոց պատմության, դիցաբանական, ազգագրական թեմաներով գործերի, հայկական, մանրանկարներից ընդօրինակումների: Կատարել է Թիֆլիսի Ս. Գևորգ եկեղեցու որմնանկարչական և քանդակագործական ձևավորումները, Կուսանաց անապատի Ս. Ստեփանոս, Արմավիրի Ս. Գևորգ եկեղեցիների վերաշինությունը, պատրաստել Կարսի Ս. Գրիգոր եկեղեցու բեմը, դուռը ևն: Ֆեթվաճյանն առավել ճանաչվել է «Արևելյան փոստ», «Սասունցի կինը» («Մանուկ Հայաստան», ՀԱՊ), «Ղևոնդ Ալիշան», «Վենետիկի Ս. Մարկոսի տաճարը», «Մատթեոս Իզմիրլյան» կտավներով: 1922-ից ապրել է ԱՄՆ-ում:

Կտակի համաձայն՝ գործերը հանձնվել են ՀԱՊ-ին:

Աղբյուրը՝  «Ով  ով է: Հայեր» հանրագիտարան, հատոր երկրորդ, գլխ. խմբ. Հովհ. Այվազյան, Հայկական հանրագիտարան հրատ., Երևան, 2007, էջ 692:

Տես նաև՝

Տեսադարան (Արշակ Ֆեթվաճյան)

Շրջագայութիւն նկարչաց աշխարհին մէջ, ՀԱ, 1892. N" 1-6, 9-11, 1893, N9 3: Իմ մտքերը, Բոստոն, 1941:

Շիշմանյան Ռ., Բնանկարն ու հայ նկարիչները, Ե., 1958:

Տեր-Մանուելյան Ա.. Նկարիչ Արշակ Ֆեթվաճեան, Բեյրութ, 1966: