ՖԵԼԵԿՅԱՆ, դերասանուհի քույրեր:
Վարդիթեր Սիմոնի Ֆելեկյան (1869, Կ. Պոլիս - 1952, Կ. Պոլիս), Մարի-Հրանույշ Սիմոնի Ֆելեկյան (1875, Կ. Պոլիս - 1936, Կ. Պոլիս): Բեմական գործունեությունն սկսել են 1880-ական թթ կեսին Թիֆլիսում, խաղացել են նաև Բաքվի հայկական թատրոնում, հյուրախաղերով և առանձին խմբերով՝ Շուշիում, Երևանում, Ալեքսանդրապոլում, Թավրիզում, Թեհրանում: 1904-ին Եգիպտոսում կազմակերպել են թատերախումբ, ներկայացումներով հանդես եկել ԱՄՆ-ում (1908): 1910-ից մասնակցել են պոլսահայ թատերական կյանքին, 1919-ին Կ. Պոլսում կազմակերպել Ֆելեկյան թատերախումբը (գործել է մինչև 1922-ը):
Մարի-Հրանույշ Ֆելեկյանն առավելապես աչքի է ընկել կատակերգական դերերով՝ Մադամ Սան Ժեն (Սարդուի և Մորոյի «Մադամ Սան Ժեն»), Ֆրու-Ֆրու (Մեյլակի և Հալևիի «Ֆրու-Ֆրու») ևն, հանդես է եկել նաև տղամարդկանց դերերով: Մարի-Հրանույշ Ֆելեկյանը դուստրն է դերասանուհի Իրմա Ֆելեկյանի (Թոթո Բաբաջա, 1912, Կ. Պոլիս - 1992. Ստամբուլ): Հիմնականում խաղացել է կատակերգական դերեր Կ. Պոլսի տարբեր թատրոններում: Նկարահանվել է թուրքական կինոնկարներում, հանդես եկել նաև որպես երգչուհի:
Աղբյուրը՝ «Ով ով է: Հայեր» հանրագիտարան, հատոր երկրորդ, գլխ. խմբ. Հովհ. Այվազյան, Հայկական հանրագիտարան հրատ., Երևան, 2007, էջ 692:
Ալեք Մանուկյան 1,
ԵՊՀ 2-րդ մասնաշենք,
5-րդ հարկ,
Հեռ.` + 37460 71-00-92
Էլ-փոստ` info@armin.am
Բոլոր իրավունքները պաշտպանված են: Կայքի նյութերի մասնակի կամ ամբողջական օգտագործման, մեջբերումների կատարման դեպքում հղումը պարտադիր է` www.armeniaculture.am